صالون ناس صالح سنوسي

من طرف الموج الازرق السبت أغسطس 18, 2012 3:30 am

الجزء الاول
قعدنا انا ومحمد صالح ومحمد بشير نحكى عن ذكرياتنا والدنيا عيد ومتعودين كل إجازة تلمنا سوا كان فى عيد ولآ مناسبة نحكى لبعض حكاوى الدنيا الما بتنتهى وبدأ كل واحد يحكى عن نفسو وبدأت انا والوكت عصر وانحنا في صالون ناس جدي صالح :
انتو عارفين ياشباب انا سنة 2000 كملت الجامعة ورجعت البلد وما عارف اسوى شنو وبقيت من ضل لضل والقرف حصل خصوصاً شلة الجامعة والجكس دا كلو فقدتو وبقيت اناجى نجوم الليل براى وابوى وكت شاف قعدتى طولت ومعديها شراب جبنة مع الحاجة فى الضهرية نادانى وقال لى :
- ياولدى لبتين بتقعد كدى من ضل لضل حارس امك دى النهار كلو
- اسوى شنو ياابوى
- ابقى زى الجنيات التانيين ديل وشوف ليك شغلة إشتغلة
- والله إلا كان اسوق لى رقشة ولا اركب لي هايس
- ونحن قريناك عشان دا
- اسوى شنو شهادة الجامعة ما بدونا ليها إلا نقضى الخدمة الوطنية وكمان كما قضيناها شغل زاتو مافى وهو اصلاً مافى .
- هسة عليك الله ياولدى تعبنا دا يروح فى الفاضى ساى وصرفنا عليك انت واخوانك العدمتونا بيهو التعريفة وخليتونا نعصر على بطنا عشان تتعلموا وتبقوا ناس يروح كدا - وتجئ تقول لى رقشة وهايس ما كان ريحتونا من زمان ودخلناكم السوق بدل الجامعة الهرتنا دى .
- ظروفنا جات كدى وزمنا بقى صعب
- شوف ياولدى قعاد فى البيت ساى زى دا ما بفيدك غير يعلمك الصعلقة والمباراة سوى خدمتك دى والله كريم بعدين
- سمح يا ابوى
وتانى يوم طوالى سفر للخرطوم واقدم مع الخريجين والقى نفسى شالونى معلم خدمة وطنية رياضيات وفيزياء فى بورتسودان وهناك وزارة التربية والتعليم بتوزعنا على المدارس وما فارقة معاى يودونى محل ما يودونى المهم افك الساجور دا وانسى قصة (سناء ) :
يخش فيهو محمد بشير
-يا اخى نحن ما نسينا ، موضوعك معاها الحصل فيهو شنو
- والله بقى ذكرى وماضى جميل .
-اها كدى ورينا الحصل شنو
- انتو زى ما عارفين انو البنية وراى بدفعتين والحصل انو جاها عريس جاهز وما عندو مانع تقرأ وتعرس واهلها ماصدقوا الفرصة دى وبقت تدفر فينى وتلز لى فى صاحبتا عشان اجئ اخطبا والباقى عليها بصراحة ما قدرت حتى اجئ بجنب بيتم - امشى اقول ليهم شنو ، وانا اكل فى خشمى ما قادر عليو يومى كلو وجبة بوش ولمن اضوق لحمة يجينى إسهال عشان ما متعود عليها .
-اها سويت معاها شنو ؟؟؟؟؟؟؟
قعدّتّ بت الناس فى الواطة دى وقلت ليها
- يا سناء والله انا بريديك اكتر من عيونى بس احسن تشوفى مستقبلك وخلينى انا احلى زكرى
- بس ياهنودي انا ما متخيلة حياتى من دونك
- ياسناء خلينا واقعيين إنت جاك زول جاهز وما فيهو عيب وانا لسة ما تخرجت وقدامى مشوار طويل وإنتى بت ما ممكن تنتظرينى كتير وحرام على احتفظ بيك وانا ما قادر اسوى ليك شئ
- يا اخى الله كريم وربنا بفرجا وهسة ياهو انت باقى ليك شهور تتخرج وتشتغل وانا مستعدة اعيش معاك حتى لو فى راكوبة بس تكون إنت معاى
واحاول اهدئ العواطف شوية واقلب الجو لهظار :
- هسة عليك الله العاجبك فينى شنو مفلس ومقحط وجيعان عديل كدا
- تضحك وتعاين لى : شناتك البتكسر دى العاجباني
- والله كويس خلى الشنة دى تفتح لينا بيت
المهم قدر ما حاولت جاى لجاى كلو كلو طريقة ليها مافى عشان تقنعنى بيها وكت يأست خلاص وفترت وحاولت وحاولت وبقيت ازوغ منا واتجنبا لحدى ما قنعت منى وعرست والحمد لله عايشة حياتها وكمان هسة عندها طفلة عسولة زيها .
ويقوم ينط محمد صالح ويقول لي : هسة خلينا من سناء بتاعتك دى و ورينا بورتسودان كيف كانت معاك
- اها سافرت بورتسودان وهناك اتوزعت فى مدرسة ثانوية حقت بنات ومشيت المدرسة شايل اوراقى لمديرة المدرسة والمديرة دى خليها ساى هارشة الناس كلهم غايتو مرة زى دى ما شفتا ، مرة صعبة والله تعاين ليك ساى تخوفك وعاينت لى بصرامة كدى من فوق النظارة :
- اهلاً يااستاذ شرفتنا
- اهلاً
وامد ليها الاوراق وتقلب فيوم كدى وتنادى معلمة وتعرفنى عليها وتقول لى دى رئيسة الشعبة امشى معاها عشان توريك جدول حصصك . وتسوقنى لمكتب كدى ومن ديك اللحظة بديت شغلى فى المدرسة .

من طرف الموج الازرق السبت أغسطس 18, 2012 3:39 am

الجزء الثاني

ساقتنى آبلة آمال ( حسب ما ناس بورتسودان بنادوا المعلمات )رئيسة الشعبة لمكتب جنب مكتب المديرة وقعدتنى على تربيزة وقالت لى : دى تربيزتك يااستاذ وخمت ليها كتب وجابتم لى ومعاهم دفتر جميل هدية منا عشان احضر فيو الدروس وحسيت بطيبتا وظرافتا ورغم انو تنشاف اكبر منى بسنين بس عليها جمال وانوثة واضحة وكمان إحترام وكلاما طيب وحسستنى بأنى مهم وكأنو بتقول لى : ما تيشل هم انا معاك هنا وبساعدك وقعدت شوية بعد ما شخبطت ليا فى ورقة كدى وجابتا لى وقالت لى :دا جدولك يا استاذ مهند وهاك ياتفاصيل الحصص والفصول وكلها اول وتانية .
جرس الطابور الصباحى ضرب وبكل ذوق ورقة طلبت منى آبلة آمال احضر الطابور الصباحى معاهم وهناك فى الطابور اشوف ليك جيش من البنات فى عمر الزهور وفى اشكال مخلتفة والوان مخلتفة ويجمعم زى واحد وفى الوسط المعلمين والمعلمات وبرة الطابور الفراشات والعمال وبدت المديرة فى إدارة الطابور بعد تحية العلم رحبت بينا وتمنت لينا عام دراسى حافل بالنجاج فى المدرسة وعددت نجاحات المدرسة السابقة والطالبات اللاتى تفوقن والتحقن بالجامعة يحملن فى صدورهن حب وذكريات لهذه المؤسسة ثم قلبت بالوعيد بكل واحدة تتلاعب ودى اول محاضرة من حضرة المديرة ومن صباح الرحمن وبعدها البنات مشوا للفصول وحسيت انو انا عايش فى عالم جديد حاينسينى جبنة امى بتاعت نص النهار وانصرفنا للمكاتب .
دق جرس الحصة الاولى واشوف فى جدولى انو اليوم عندى حصتين دبل فى سنة تانية وانا مامحضر واجئ براحة لآبلة آمال واوريها الجدول واقول ليها بأدب واخير لى كدى اتأدب واتمسكن عشان ما اشوت لى شوتة تطلع ضفارى ولا انزل برشوت اتظلط قلت ليها : ياأستاذة انا عندى حصتين هسة وانتى عارفة انا دا اول يوم اجئ فيو وطولت من المقرر وقبل ما اكمل كلامى تنادى على المعلمة المعانا :
- سوسن دقيقة عايزاك
وتجئ سوسن بنية ماشاء الله حليوونا بس الوش صارهو تقول دقوها فى البيت قبل ما تجئ المدرسة وعاملة فيها حازمة ومقطعة الشغلانة وتقيف قدامنا وتتلفت ليا آبلة آمال :
- سوسن استاذ مهند دا لسة جديد وعندو حصتين رياضيات فى تانية زهراء عليك الله غطيوهم ليو
- تعاين فينى كدى التقول أكلت عشاها : سمح بس والله يآ امال الليلة جدولى مليان شديد وعندى حصص فى اولى وتالتة كمان
- معليش بس غطى ليو الليلة وبعد داك بستلم جدولو
تهز رأسا وتقول ليا : اوكى وترجع لمكتبا وتلم حاجاتا وتمشى على الفصل وكمان استاذة آمال مشت برضو لحصتها وخلونى براى فى المكتب العريض داك اقرأ زى الطلبة واشيل والخص واحل فى المسائل وما رفعت رأسى لحدى ما دخلت على حاجة (حياة )الفراشة معاها الشاى وسلمت على بتحية عفوية وكلام حنين .
المهم بديت تانى يوم من الصباح اول حصة واقول لنفسى : هووى يازول البنيات ديل كليهن فى طور خطر وصعب وكما خليت بالك وبقيت مفتح عيونك يودنك التوج واليسونو فيك النجار فى الخشب ماسواهو احسن من بعيد لبعيد ولّا اقل زوغة جاى ولا جاى تلقى نفسك قدام المرة البلدوزر دى وهاك يافضائح وانا غريب والغربة سترت حال واخير تخلى الخفة والمشاغلة وابقى زول رايق وكان عجبتك واحدة منين اكتلا فى حشاك ساى .
ادخل الفصل والريحة الحلوة فايحة فيو واتارى الاخبار إتسربت انو فى معلمين خدمة وطنية جوا وكلوهم شباب ووجاهة وادخل الفصل والبنات واقفات وما جايب لين خبر لحدى ماوصلت الشباك المقابل الباب وماعارف انا وين وبعد ما نفسى هدا شوية : اقول ليهم
- اتفضلوا
- تنط واحدة شليقة كدى : نحن بنات يااستاذ (يعنى إتفضلن )
والباقيات يضحكن ودايرات يقلبنا هظار وونسة وانا مافاضى لشيتين دا واصر وشى واعاين للبت قوى واقول ليها
- هاهاها (نظام اغيظا ) دمك خفيف واقولها بمساخة - الفصل قطع النفس

من طرف الموج الازرق السبت أغسطس 18, 2012 3:46 am

اعلان بسيط ونواصل
.
.
.
الجزء الثالث

من طرف الموج الازرق السبت أغسطس 18, 2012 4:03 am

الجزء الثالث

لمن شفنا الواطة بقت مغرب ونحن لسة فى الصالون قررنا نطلع الشارع ونعمر القعدة تانى في تحت السهريج انتو نسيتو انحنا ما حلب بنحب السهاريج .
بعد وصلنا السهريج وكمان جانا عماد سيد وبقرة جابر ومعاهم واحد ما شفناهو اول بس لما ضحك سنون شفناها بقولو ليهو عبد الحكم :
- اها قام ناطي اب تقي وقال لي يامهند شنو ، ماتواصل لينا
- خلاص بواصل كنا واقفنين وين
- فى اول يوم ليك فى المدرسة
ابوب انت متابع قدر دة يا تقو
-ايو ايو
اها من اليوم داك بقيت استاذ مهند وبقت سمعتى طيبة فى المدرسة وحتى سوسن الكانت شامانى ومكجنانى ساى بقت ظريفة معاى لكن الله لا وراكم ست إقبال مرة عصبية وشنافة وبطاعن بالكلام وزول بدورا مافى فى المدرسة وعندها حساسية إسمها معلمين خدمة وطنية وبتدينا الكلمة فى وشنا وهى ما عارفة روحنا محراقنا منها ساى والظروف جبرتنا عليها ولانحن فاضيين للكوراك دا .
- نط ليي محمد بشير : هوى يامهند سوسن دى ما كجنت معلمين الخدمة الوطنية ساى
- اى والله البنية ما خدا ليها شاكوش من استاذ خدمة وطنية قبلنا وكمان قبض منها الجو فى المدرسة وكرهها التدريس وبقى ليها فى العزيزة لحدى ماطلبت ينقلوها من المدرسة وبعد تحانيس حتين رضت تقعد فى المدرسة
-اخونا عماد ما حضر الجزء الاول ولا التاني قال لي : خلاص فهمنا ياللا تم لينا القصة ههههههههههه
- اها الوضع استمر كدى والبنات بفهمن منى زى العجب والفهم نفسيات وكراساتن ماشاء الله منظمات ومرتبات والتمارين اول باول وبقيت معاهن زى اخوين الكبير لحدى ما جاتنى واحدة من طالباتى داخلا ومعاها راجل متوسط العمر بس شكلو مرتاح سلم علي وقال :
- استاذ مهند
- نعم ، اهلاً وسهلاً
- والله بتى اسمهان دى حكت لى عنك وقالت عنك إستاذ شاطر
- والله كتر خيرا
- عشان كدى انا جيت ودايرك تدرس بتى دى فى البيت وما بنختلف معاك
المهم انا حسبتها لقيت نفسى كسبان وما خسران شئ وتبقى لى موضوع وبرنامج فى المساء ومصاريف وباركت الشغلانة وابوها طوالى قال :
-لو داير تبدأ من الليلة ماعندى مانع
- لا لا خلينا نبدأ من الاسبوع الجاى
وبديت معاها الدروس فى البيت ولقيتم ناس قمة فى الكرم والطيبة والتقدير وما قصروا معاى والبنية بتنتظر الحصة بفارق الصبر وإكتشفت انو البت الحصص دى عاملاها نظام قشرة لصاحباتا انو انا بدرسنى استاذ مهند فى البيت وعاملة بتحبنى وميتة فينى وكنت بستغل الحتة دى فى انو تفهم منى اكتر وفعلاً البت بقت فى كل المواد مهتمة ومثابرة وبقت تحب المدرسة بعد ماكانت مهملة
استمريت معاهم على الحال دا وعرفت انو عندها اختا الاكبر منا بتقرأ طب والايام بتجرى و بمرور الوكت بقيت زى سيد البيت - وفى يوم من الايام انا بدّرس البت فى الحصة دخلت علينا اختها اريج جايبا لينا الشاى بالكيك ومن عينى وقعت عليها ، بدون ما احس القى نفسى واقف على حيلى البت عليها سماحة تجنن والجسم ماشاء الله عليهو والمشية برواقة وبسمة الترحيب على وشا بعيونا الكبار ديلك خلتنى زى الاهبل وانا قايل اختا اسمهان احلى منا مافى - اتارى اريج دى شئ تانى والبت وكت شافتنى وقفت كدى ارتبكت وقربت ترمى عدة الشاى ، ختتا براحة وسلمت علىّ - اختا قالت لى :
- دى اختى اريج جات الليلة من السفر ،كانت فى الجامعة
- اهلاً وسهلاً وحمد لله على السلامة
- ردت اداء واجب : اهلاً وسهلاً ، اتفضل الشاى يااستاذ وتقول لاختا كبى للاستاذ الشاى وتمشى طوالى
وانا اتمنيت تقعد معانا شوية تاخد ليا حنك حنكين بس البت شكلها كدا ما جيبا خبر لحالى وماعارفة قلبى بجوا بدق كيف .ههههههههه بتضحكي مالك يا تقوي

من طرف الموج الازرق السبت أغسطس 18, 2012 4:06 am

ما حاتم باقي الاجزاء عشان ما تبقي
كــــــــــــــــــــــــــــــــــــــــتيرة
عليكم بعد تقروها وتدونا تعاليقكــــم
بنتمها

من طرف الموج الازرق السبت أغسطس 18, 2012 5:21 am

مع العلم القصة مكونة من 35 جزء

من طرف الموج الازرق السبت أغسطس 18, 2012 5:24 am

لا يوجد متابع حتي الان
براك خلوك تعيش زكرياتك لا مرابك وليد ولا تقوي جاتك
وين انت يا الدبيب

من طرف الموج الازرق الأربعاء أغسطس 22, 2012 5:38 pm

الجزء الرابع/

عماد سيد يتململ فى الكرسى ويعاين لى ويقول
- زولك دا ما كِتل فى بورتسودان عديل
واعاين ليو واضحك
- لكن بورتسودان بلد نصاح ويقول
- وعبد الحكم يقوم يسالو كيف ما بلد نصاح ؟؟
- ويقول ليه اسأل مهند منها العاش فيها
- مهند: والله ياجماعة ناس بورتسودان ديل تقول ما عايشين فى السودان - كتيرين فيها ساكنين فى شقق - وفى احياء كل الناس الساكنينها بعرباتهم وقريبات دى عملو ليها مواصلات بعد ما الحالة قرصت شوية - وبسمعو الاغانى العربية دى قبل القنوات الفضائية ما تظهر- ولآ شوارعها المنظمة ومبانيها العتيقة والانيقة .. ولآ ناسها الحلوين
- بقرة جابر يضحك لانو مشي بورسودان ومن قصصو الطريفة عايز يوقف ليهو بتاع رقشة وطبعا هو جديد في بورسودان واول مرة يشوف الرقشة فكان بكرك لي بتاع الرقشة : سيد الرقشة عووووووووووك :فقام مهند محجوب يا تقوي عشان ما تساليني بقرة جابر منو قال لي كدى خلينا فى ناسا خلينا مع اريح ومدرستك .
مهند :
- مامشكلة انا بديكم ليها بضبانتا
- اها ياشباب البنية كسرت فينى ضلعة وكلها عجبتنى وزى ما بغنى وردى قمر بوبا عليك تقيل الصغيرون الماكبير ..... الرقيبة قزازة عصير ..... والعيون متل الفناجين .... السنون براقن يشير ..ما بتحش قشة تناقير ...ما بتشيل جردل على الزير .......الزراق فوقا تقول حرير.......شنتنى الشبال .... ياام ضمير ..... خلى قلوب الصبيان تطير - وانا قلبى طار من يومها والنوم طار من عيونى وبقيت سارح فى هواها .....
ومن اليوم داك متمنى اشوفها تانى واتكلم معها بس طريقة مافى البنية منحشرة جوة البيت الكبير بتاعم دا وسبب ساى يخلينى اسأل منها مافى واسأل منو كان على اختها اسمهان طالبتى والخفة تب ما بتنفع وهواء جاهز يازول صبّر قلبك وموت متشحتف كدى وعيش حراق الروح الصحى صحى وكل ما اجئ للحصة اكون قاشر ومتريح ومتلمع وقلمين فى الجيب احمر وازرق والقميص والبنطلون البجئ بيهم ما بدبل لباسو عشان البنية تحن على ساى وتجئ تسلم وكفاية تشوفنى وانشاء الله ما تتكلم معاى ودا كلو ماحصل وبقيت اسبوعين بالحالة دى تعبان تعب لحدى ما جيت يوم بدرى قبل ميعاد الحصة وادق الجرس ويفتح لى اخوها الصغير ويقول لى : إتفضل يااستاذ ... وقلت فى نفسى ياسلام حتى اطفالهم الصغار معلمنهم كيف يردو وكيف يتكلمو مش زى شفعنا الواحد يفتح ليك الباب وهو جارى بنمرة خمسة لحدى مايطق الحيطة وهو مطشش ومتبكم يفتح الباب ويجرى .
دخلت الصالون اشوف ليك اريج بترفع الطرحة فى رأسها وبتتصلح : واحيها بهدوء وتحيينى وتقول لاخوها امشى نادى اسمهان ، قول ليها الاستاذ جا، ودايرة تقوم بس اقرأ ليك الكتاب البتقرأ فيهو والقاهو ليك موضوع : دا كتاب انوتومى (علم التشريح) تشيل نظارة القراية من عيونها وترد:
- ايوا
وطوالى هجمة مباغتة :
-انتى بتقرى طب ( وانا عارفها بتقرأ طب اصلو اختها كلمتنى لكن عاملو موضوع وبس)
- ايوا
- واطقطق فى اصابعينى مرتبك : فى سنة كم
- فى سنة تالتة
غايتو قراية الطب دى تشيب الرأس اخير لينا هندستنا دى
البت تعاين فينى مستغربة ومحتارة هندسة شنو هندسة والله قرينا انتاج حيواني بس لزو حنك وكدة
- إنت قريت هندسة
- ايوا
- معليش سؤال بس البقاك استاذ شنو ؟؟؟
- اضحك كدى واشيل نفس ماخلاص البت بقت تنجذب معاى فى الكلام واقول : الخدمة الوطنية
- آآآآآ انت استاذ خدمة وطنية
- ايوا وانشاء الله بعد مااكمل الخدمة دى بشوف هندستى بوين
- وتدعو لى : ربنا يوفقك وقريت هندسة شنو
- هندسة مدنية
عاينت لى معاينة إهتمام وسألتنى : اها اسمهان دى كيف شاطرة زيك كدا
- وانا طوالى ماصدقت وقلت اهاظر معاها يمكن رأسها يجئ :هيه هيه واتكشم : هسة القال ليك منو انا شاطر
- تبتسم وأبتسامة وحاة الله برق يشلع وتقول : فى زول بقرأ هندسة ما شاطر
- يازولة نحن كان شطار مع طبكم دا بختونا فى كنبة الاحتياطى
- لا ماتقول كدا ياباشمهندس ( البت قلبت من استاذ) والله انا نفسى اقرأ هندسة و قراية الطب دى على رغبة ابوى وناس البيت والحمد لله ماشة فيها لحدى هسع كويس
- انشاء الله تتخرجى لينا دكتورة ونجئ نتعالج عندك - وبقلبى اقول ليها عالجى قلبى بس الباقى هين بديهو قرض ولا لالوب والسلام .
تضحك وتدخل اسمهان شايلة شنطة المدرسة وتستاذن اريج وتقول :
- عن إذنك يااستاذ ،اقوم اسوى ليك شاى
- يااخى انا ما ضيف وماتعبى نفسك الحالة واحدة
- لا ما بكلفنى شئ وبعدين انا زاتى زهجت من القراية اخير اغير جو شوية
وتستاذن وابدأ الحصة مع اختها بمزااااااج وبالى رايق وقلبى من جوا يرقص من الفرحة ماخلاص الحنك العاوزو لقيتو ولازم اصل ليها واقول لنفسى بالله شوف البت دى وجاهتى دى كلها الكسرت سناء ماجابت نتيجة معاها ولالفتت نظرها لحدى ما عرفتنى خريج هندسة احترمتنى واهتمت بى شوية . وشايها كان احلى شاى .
وقبل ما امشى جانى ابوها من جوة شايل فى يدو ظرف فيهو قروش ومداهو لى وانا رفضت اشيلو بس هو اصر شديد وقال لى : يااستاذ دا حقك وانت ماقصرت مع بتى والله مستواها بقى ممتازة والمديرة امس بعد إجتماع مجلس الاباء قالت لى : بتك ماشاء الله بقت شاطرة شديد وقفلت مواد كتيرة فى الاختبارات والمعلمات بشكرّن فيها والفضل بعد الله يرجع ليك يااستاذ - بعد ما شيلت الظرف وعصرتو فى يدى قدمنى للباب وقبل ما يودعنى قال لى : يااستاذ الجمعة الجاية بننتظرك بالغداء وانت ماداير عازومة لانك ماغريب وبعدين اعتبرنا اهلك وحاولت اعتذر بس ما ادانى فرصة وقلت ليهو : خير

من طرف الموج الازرق الأربعاء أغسطس 22, 2012 5:45 pm

الجزء الخامس /

اها اقوم اقول ليهم : ياشباب رأيكم شنو نكمل باقى الحكاية بكرة ونشوف طريقة للعشاء ويقولو بصوت واحد : وين عمك طريقة ليك مافى والليل لسة طويل والجو يادوب راق وبقى حلو .. وكان على العشا ما دايرنو بس كمل لينا حكايتك دى وحبوبة هلالة اهديك رسلت لي العيش العشاء عندها ارح نمشي صالون ناس سيد
- هو ي ياجماعة انا قرضنى الجوع
قبل كلامي جاتنا بي عندنا خالتى سعدية ام انس كواب ،سلمت علينا وتلتفت مهند محجوب وقلت ليهو انا ما قلت ليك جيب لي كليقة برسيم لي بهمي ديل
اووك والله مرق من بالى ، الله يجازيك يا مهند
وتعاين لينا
- ياها حالتكم من صغار من تتلموا سوا تانى ما بجيبو لزول خبر الله يحفظكم ويغطى عليكم يااولادى
.
اها عماد لمن شاف مهند محجوب جاى علينا دخل البيت يجيب العشا وختاهو قدامنا بدو يبلعو فيهو سريع سريع عشان يفضىو لي لي القصة وبعد العشا اواصل ليهم الجكاية :
اها ياشباب يوم الجمعة كربت عمتى وختيت شالى فى كتفى واندرعت لى فى مركوب حق اصلة مشتريهو للحاجات الزى دى ودورت على بيتم وهناك لقيت ابوها منتظرنى فى البيت وبعد مادخلنى على البيت بجوة عشان اسلم على ام الاولاد البنات نظام بريستيج وكدا وبعدها مشينا على الصالون ونقعد شوية يدخل علينا ولد مشوطن كدى ومطوفش اول مرة اشوفو فى البيت ويسلم على سلام تقول بعرفنى ليهو زمن عمك يقول لى :
-دا ولدى امير
-اتشرفنا
اهلا يااستاذ وينط فى الكلام : يااستاذ انا داير امتحن رياضيات تخصص ودايرك تدرسنى ليهو
ابوا الولد يفكها ضحكة ويقول : كدى انت اعرف الحساب خلى الرياضيات
انا استغربت من كلام الابو لولدو وماخلانى محتار كتير وقال للولد : تمنتاشر زايد سبعة كم
والولد يرد : واحد وعشرين والابو يعاين فيهو قوى : لا لا اربعة وعشرين .... دقيقة ايوا اتنين وعشرين وهضربة تقيلة
-اها يااستاذ دا زول بمتحن شهادة سودانية خلى رياضيات تخصص
-انا اتحرجت وماقدرت اقول شنو وخفتا على نفسيات الولد وقلت اخير اسكت والضحك من جو كاتلنى عشان اول مرة اشوف بلادة زى دى، وانا من شوفتو ساى عرفتو دا مازول قراية وهو كأنو حيطة ولا هاميهو الكلام ولامؤثر فيهو واحاول انقذ الموقف :
-والله ياحاج انا من راى تشوف ليهو شغل يشتغلو احسن
-يازول دا ما بنفع سلطة ، ولد مدلع ومعديها حوامة ساى ومرضنى مرض !!! ويجر نفس قوى ويتنهد : يااخى انا شغلتو معاى فى الشركة قلت إملأ وقتو بدل الحوامة دى وكمان يتعلم ليهو شئ ينفعو وانا مادايم ليهو ، بس خليهو ساى قضها مقابضة مع الموظفات وهترشة مع الموظفين
واهون الامر عليهو :
- ربنا بهديهو ودى فترة مراهقة وشقاوة لمن يكبر بخليها
وقلت لابوهو : انا ممكن احسّن مستواهو شوية انشاء الله يجب حق الحكومة بس وتكون عندو شهادة سودانية ساى
- يعاين لى معاينة زول قنعان : امير دا ياأستاذ قريناهو الثانوى بدون شهادة اساس يعنى إمتحان طريقة ليهو ما في البركة فى اخواتو ديل كلهن شاطرات ومهتمات وكان عليهو يقرأ كدى لحدى ما اخوانو الصغار ديل يلحقوا .
الوكت مشى سريع وما لقيت طريقة اشوف اريج كلو كلو وقلت يازول الحق البت قبل إجازتا ما تتنتهى ووريها شعورك بس اوريها كيف وانا ماقعدت معاها غير مرة واحدة وكمان حب الجوابات انتهى زمان وبقى مرحلة وعديناها ما ممكن اسويها مع الدكتورة دى ، هسة انا اسوى شنو ماقادر اصبر واقول ااااااخ لو القى لي معها قعدة قعدتين اجيب فيها رأسا وتبقى لى اغلى حبيبة واعز زولة وحب طاهر عفيف