الدوبيت اوجاع القصيد

من طرف **العمرابى** الأحد أغسطس 05, 2012 9:18 am

أحبائي سأفرد هذه المساحة للدوبيت على مختلف مشاربه ...
وسوف أعود للتوثيق التعريفي اللغوي له فيما بعد ...
ولكم مني هذا المربع الذي أشعر بأنه يضج في خاطري
رحم الله قائله :ليل الغربة هوّد والبروق إتلالن
دموع الوجعه جن زي السحابات سالن
ملن قِرَبْ العيون لكنهن ما سالن
مو من قلهن
بس في الوجوه ما خالن
وخلوة النمة ملك الجميع
واحدين قاعدين في البيوت ما بختروا
من كُبِي وكشف حال الحريم ما بفتروا
بختر براي أسد الهشية بنترو
وصاحبي إن زل ما بفشاهو ديمة بسترو
وفي الفخر ايضاً:أنا البحر الكبير إن عبّروني
وأنا شوك الكتر إن جرجروني
أنا رحل الكحل إن ميلوني
أنا الجن البخلي الزول إنوني
وأيضاً :
أنا التوب العشارى الـباهـى زيقو
وانا الدابـى إن كمـن لـلزول يـعـيـقـو
وانا فـراج الــرجال وكـتــين يـضــيقو
وانا الـمأمون على بنوت فريقو
وأيضاً :انا البحر الكبير الدابو حَمَّر
انا قدحة زناد مدفع معمر
بشد البانقير جملى المضمر
وانا ابراهيم اخو ام دهباً مجمر
وفوق درب جدنا ود شورانى.
الليل امسى والبل حررنو مشهين
عقبن موية والجبل اب قرود راجيهن
دا الخلانى فرض الخمسة ما مقضيهن
رزق الدنيا والمحن البصارع فيهن
وهاك دي للشاعر ود ضحوية
الليل أمسى والنعسان جرايدو بدحن
كبس الهم علي السلط قلوبن وحن
كضم الجره سحار الغروب وإتمحن
نعود سلمانه يا عمر الظنون إن صحن
وقال أحدهم عندما حُكِمَ عليه بالسجن واصفاً حاله وموفقه الحالي والقادم :
إتسجنا والشمات بقولوا مليح
أهل الوجعة صابرين والمحن بتطيح
يا من ليه جانب في المدينة يصيح
جلواك قَفّل الباب البجيب الريح
وقال عكير الدامر رحمه الله
ممشوق القوام الما وجدت نظيرو
جفاهو إلي أخير لي من محنة غيرو
جافاني العزيز الكنت ديمه نصيرو
هو يسوي الغلط وأنا أسوي كَتّر خيرو
شبال صغير :أتهجرني وتورثني إلتياعاً
وكنت الشمس تشرق في حياتي
وحبك قد تفجر في الحنايا
ينابيعاً من العذب الفرات
تعاتبني بأني قد ذممتك
وهل أقوى على تجريح ذاتي
فإن عدتم فيا سعدي بعودٍ
يعطر بالمودة أمسياتي
وإن كان الفراق جزاء صبري
فإن القبر أولى بالرفات
وللحاردلو نصيب من الكلام الرصين ففي إحدى المرات زار حديقة الحيوان فوجد شبل الأسد داخل القفص فخاطبه بقوله :
جابوك للبنادر ساكت درادر وضيعه
وأمك في الحريم ماها المرا السمّيعه
نترات ناس أبوك اللرجال لويعه
وإتّ إن كان كبر جنباً تقلب البيعة
وقال ود ضحويه رحمه الله :
يوم بنداور البكرة ونمصرو ثديها
ويوم بنشق عتاميراً بعيدة وتيها
يا نفس السواد المتعة كملتيها
أبقي لزومه وكت القرعة وقعت فيها
وقال أيضاً عندما أصيب جمله في عينه :
ما تستاهل العورة وخسار العين
وكم من قجه فوق ضهرك بحلحل دين
كتير من فارق النزهة ورضا الوالدين
الباقي الله يا هجام فريق أم زين
ما بابى المسيكين والفقير بي فقرو
وما عواس قوالة وما رفيقي بعقرو
بدخل لجة الوادي البتلب صقرو
قلبي مكجن الناس السوا وبتنقرو
وقال الحارداو :
يا رب العباد أنا قلبي كاتم سرو
ما لقيت من يدرك المعنى بيهو أبرو
قصبة منصح الوادي المخدر درو
قعدت قلبي تطويه وكل ساعة تفرو
وقال عمر بن أبي ربيعة :
أيا من كان لي بصراًً وسمعاًً
فكيف السلو عن بصري وسمعي
يقول العاذلون نأت فدعها
وذلك حين تهيامي وولعي ً
أأهجرها وأقعد لا أراها
وأقطعها وما همت بقطعي
وأقسم لو حلمت بهجر هندٍ
لضاق بهجرها في النوم زرعي

الأحد	الإثنين	الثلاثاء	الأربعاء	الخميس	الجمعة	السبت
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30