ريحة التراب

من طرف **العمرابى** الأربعاء نوفمبر 13, 2013 10:35 am

والله يا ريحة التراب
شديتنى للماضى البعيد
عبر الزمان
في اللامكان
عبر الكون
جوه اللى كان
مشوار غريب
حفيان
وطيت جمر ام لهيب
الروح تهيم
فوق النجوم
والفانى
.. مطمور في التراب
والله يا ريحة التراب
كيفن يكون درب الوصول
لى ساحة ما شقاها زول
من دونى دونك
الف باب
وكم حجاب
وكم ستور
مندلى يا ريحة التراب
اصلى مليت العذاب
جيتا خايد في الضباب
شوق ليالى الغربة
في اعماقى داب
الحنين
جوه جوفى
قصه ماشافت كتاب
الصغيرون ..
بى شقاوة الدنيا يا .. يمة شاب
والله ياريحة التراب
العطش يبس لهاتى
جيت اهاتى
جاوى
لى موية الرهاب
والله ياريحة التراب
جيتا تعبان
داير ارقد داير انوم
انسى نفسى
والشقى القاسيتو
فى وادى الهموم
داير الولى النسمة
بى فرحة صغيره كره السموم
والله يا ريحة التراب
ريحة التراب . والله ياريحة التراب
لازم
اوصل مهما كان
اوعى ..
ما توصينى كنا وكان زمان .. !!
الزمان
يا اصلي ما ليه امان
ونحن فى ساحاته
زي خيل الرهان .. !!
والله يا ريحة التراب
لازم اوصل مهما كان
حتى كان
سدت سواعد الليل
دروب الكون وما خلت مكان .. !!
حتى كان جار القدر
شدانى في قاع الزمان ..!!
مو ضلام الليل بشيلو
وبمشى لى فجر الامان ..!!
يا سلاسل القدرة
ما برضى الهوان
بمشى فوق المستحيل
بقدل وبتبختر كمان .. !!
لازم اوصل
لى مشاتل ريدى
في ارض الحنان
والله يا ريحة التراب

الأحد	الإثنين	الثلاثاء	الأربعاء	الخميس	الجمعة	السبت
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30